Vilagarcía de Arousa | Sábado, 18 de Noviembre de 2006
Os comuneiros solicitan axudas como as que reciben os mariscadores polas riadas
A Consellería do Medio Rural organizou unha charla informativa en Rianxo sobre o novo decreto da Xunta de Galicia para a prevención dos incendios forestais, un acto que foi aproveitado polos comuneiros do Concello para denunciar o seu malestar polo escaso apoio que están recibindo.

M.O.R. > RIANXO
Membros de comunidades de montes, o concelleiro deMedio Ambiente, Xoán Piñeiro, e o técnico Segundo
O técnico de Medio Rural, Segundo Ruiz, explicou que a normativa "busca evitar o perigo dos lumes nos núcleos rurais" e "irá acompañada dunha nova lei de montes que se aprobará en 2007 e que recollerá o contido deste decreto e outras medidas" e tamén anunciou que está prevista a creación "dunha nova lei de ordenación do territorio e do banco de terras". As charlas que, segundo dixo, "están tendo moi boa acollida", celebraranse ata o mes de febreiro e pode solicitalas calquer colectivo interesado no decreto.

Nesta norma establécense "faixas de especial protección" comoas parcelas que se atopan fóra do monte e a menos de 25 metros do perímetro deste, e dítanse distancias mínimas que haberá que manter na repoboación das distintas especies. Así as árbores de crecemento rápido, como o eucalipto ou o chopo, terán que estar "a 50 metros das vivendas" e os propietarios terán que manter limpos os terreos repoboados.

Ruiz tamén afirmou que "os terreos forestais incendiados non poderán cambiar o seu uso" e destacou que "xa existe unha liña de axudas para repoboar o que se queimou".

Comuneiros > Os membros das comunidades de montes que asistiron á charla, denunciaron a pasividade da Consellería durante a vaga de incendios que arrasou a localidade. Afirmaron que "aínda están agardando polas axudas de Medio Rural" e que a Consellería concede as axudas para limpar o monte en outubro "cando é tarde". Para eles a Consellería de Pesca si está cos mariñeiros cando chegan as riadas porque o "mar dá cartos e o monte non" e afirman que o problema do monte é "que non está posto en valor".

Din que Medio Rural con este decreto "vai en contra dos propietarios porque parece protexer as edificacións e non o monte" e quéixanse porque "non obriga a limpar as fincas privadas se non están ó lado das casas".