O Común dos Veciños
 Revista informativa da Organización Galega de Comunidades de Montes Ano 6 Número 7 Setembro 2004

O monte veciñal nos parlamentos

Interpelación socialista no Senado

No mes de setembro do pasado ano, o senador lucense do PSdG/PSOE Luís Ángel Lago Lage, presentou no Senado varia emendas á Lei Básica de Montes:

-Que se recoñeza ao monte veciñal en man común como unha propiedade especial, xa que non é nin monte de titularidade pública nin monte de titularidade privada común.

-Que se corrixa o que a lei chama “aproveitamentos forestais” como aproveitamentos do monte.

-Que se inclúan como aproveitamentos do monte todos os recursos que ten o monte, ademais dos forestais: canteiras, cogomelos, enerxía eólica...

-Que se recoñeza na lei que Galicia ten competencias exclusivas sobre o monte veciñal.

Estas emendas supoñen a defensa da figura do monte comunal como unha propiedade dos veciños e a solicitude de que se lle permita desenvolver todos os seus recursos. As emendas foron rexeitadas polo Partido Popular, que ten demostrado un abandono absoluto polas terras veciñais.

A entrada do novo goberno do PSOE abre un horizonte de esperanza para o monte veciñal. Agardamos que os deputados socialistas galegos traballen na liña marcada polas emendas do Sr. Lago Lage para recoñecer os importantes servicios que presta á sociedade os montes veciñais galegos e solucionar o problema fiscal e outros pendentes. 

Iniciativas do BNG no parlamento galego

O Grupo parlamentario do BNG na cámara lexislativa ten presentado nos meses pasados varias iniciativas sobre o monte veciñal:

-Dúas interpelacións sobre se a Xunta de Galicia ten previsto tomar algunha medida para a participación das comunidades de montes no deseños de planes e medidas de loita contra os lumes forestais e sobre se a Xunta de Galicia participou na elaboración do anteproxecto da Lei de Montes estatal.

-Unha pregunta para saber se a Xunta de Galicia ten previsto presentar no Parlamento Galego unha lei que regule o gando ceibo nos montes, promovendo acordos entre gandeiros e propietarios dos montes.

-Dúas proposicións non de lei para que a Xunta de Galicia forme unha “Mesa contra o lume” na que estean representadas as entidades relacionadas co monte e para que a Xunta de Galicia suprima o Imposto sobre Sociedades que grava os montes veciñais en man común.

 -Proposición non de lei sobre a Reforma do Plano Forestal no que promova a reforestación con frondosas autóctonas e favoreza a diversidade vexetal.

-Proposición de habilitar unha liña de asesoramento e axudas para medidas silvícolas en colaboración cos propietarios das terras e as sociedades de caza.