O Común dos Veciños
 Revista informativa da Organización Galega de Comunidades de Montes Ano 6 Número 7 Setembro 2004

 O Concello de Pazos de Borbén homenaxea ás comunidades de montes de Galicia

O Concello de Pazos de Borbén rendeu, o pasado 14 de Decembro, unha sentida homenaxe ás comunidades de montes de Galicia nun acto entrañable e multitudinario no que colaborou a Organización Galega de Comunidades de Montes (ORGACCMM) e na que participaron representantes de mais de 400 comunidades de montes de toda Galicia. 

O acto principiou cunha conferencia sobre a historia do monte veciñal a cargo de Xosé Carlos Morgade, historiador e membro da xunta rectora da ORGACCMM. De seguido o alcalde e o presidente da ORGACCMM descubriron un monolito en homenaxe ás comunidades de montes de Galicia na Praza do Concello. A continuación realizouse unha plantación de especies autóctonas polos nenos e nenas dos centros de ensino de Pazos de Borbén e ofreceuse un viño galego ós numerosos asistentes. 

Esta celebración é froito dun acordo plenario tomado por unanimidade na Corporación Municipal de Pazos de Borbén, a proposta da oposición (BNG, Independentes e PSG/PSOE) que o goberno do PP asumiu tamén. Esta homenaxe é a primeira que unha institución (neste caso un concello) lle rende ó monte veciñal e ás comunidades de montes de Galicia.

Os representantes das entidades presentes valoraron especialmente a xustiza desta homenaxe, que supón un recoñecemento ó labor dos veciños dos lugares e parroquias e ós seus órganos de xestión (asembleas xerais e xuntas rectoras) na administración democrática dunhas terras de gran valor ecolóxico, social, económico, cultural e histórico.

Os rectores da ORGACCMM acolleron esta celebración como unha homenaxe a todos os homes e mulleres que dende o anonimato, co seu esforzo e xenerosidade, loitaron primeiramente por recuperar para os veciños os montes comunais que foran usurpados polos concellos franquistas, logo traballaron para poñer en marcha as comunidades de montes e agora seguen ofrecendo o seu traballo para estudiar nos montes veciñais alternativas viables que, baixo o concepto de sustentabilidade, sirvan para que estas terras sexan pezas importantes para o desenvolvemento rural e local. Considérase pois un merecido recoñecemento a un labor de moitos anos loitando pola defensa das propiedades dos veciños.

Os representantes das comunidades de montes valoraron moi positivamente esta celebración promovida polo concello de Pazos de Borbén, que debe ser un primeiro paso nun camiño de entendemento común:

-Que as administracións publicas, mesmo os concellos, deixen de conceptuar aos montes veciñais como unha reserva de chan barato no que se pode instalar calquera tipo de dotación.

-Que os concellos se entendan cos comuneiros recoñecendo este tipo de propiedades como veciñais.

-Que concellos e comunidades de montes colaboren para potenciar as funcións social e ecolóxica, que benefician a toda a sociedade.