O pasado 15 de marzo, a Organización Galega de
Comunidades de Montes celebrou no Auditorio “V Centenario” de Baiona a
súa Asemblea Xeral Ordinaria, cos puntos previstos en calquera asemblea
anual: memoria de xestión, balance económico, etc. A asemblea aprobou o
mantemento para o ano 2003 da cota anual de 120 € que xa leva varios
anos en vigor e a alta de dez novas comunidades de montes na ORGACCMM.
Nesta ocasión os debates centráronse na elaboración
dunha axenda anual de servicios, a Lei de Montes estatal que está a punto
de aprobar as Cortes do Estado e que supón un novo ataque ó monte veciñal
galego e a necesidade de informarse sobre a metodoloxía empregada nos
dous sistemas actualmente existentes en Europa na certificación da
madeira: o FSC e o PEFC.
Pola tarde celebrouse a VI
Xornada monográfica sobre o monte veciñal, esta vez dedicada a “As
mancomunidades de montes e o desenvolvemento local e rural” no que se
deu un repaso á actividade das mancomunidades, os seus problemas e os
seus éxitos.
Primeiramente
Xosé A. Pereira, secretario da Mancomunidade do Val Miñor, presentou o
relatorio “As mancomunidades de montes: administración e xestión”,
para dar paso de seguido ó relatorio “Mancomunidades de montes e
desenvolvemento local” a cargo de Claudio Quintillán, membro da
Mancomunidade de Montes do Castrove. Tras un breve coloquio, comezou unha
mesa redonda, moderada polo Coordinador Xeral da ORGACCMM David Díaz, con
representantes das mancomunidades de montes do Barbanza, Pontevedra, Val
Miñor e Monterrei, que falaron sobre as súas experiencias na xestión
das mancomunidades, da súa importancia e das dificultades para
organizalas. O acto finalizou coa lectura das conclusións a cargo de Xoán
Collazo, vicepresidente da Organización.