Constituída a “Mesa
por un monte sen lumes”
Recollendo un mandado da súa Asemblea Constituínte, no
pasado novembro a Organización Galega de Comunidades de Montes presentou á
Dirección Xeral de Montes a proposta de creación da “Mesa por un monte sen
lumes”, formada por todos os os sectores relacionados co monte (Administración
galega, comunidades de montes, asociacións forestais, grupos ecoloxistas,
centrais sindicais, rematantes de madeira e empresas forestais, sindicatos
agrarios e grupos políticos) cunha dinámica de traballo baseada na análise
das causas dos lumes forestais (distintas en cada comarca) co fin de ir
artellando solucións, xa foran políticas, técnicas ou lexislativas.
O Director Xeral de Montes aceptou parcialmente a nosa
proposta, pero pretendeu introducir cambios: propuxo a formación do que chamou
“Grupo de Traballo Forestal” composto pola Administración galega, a
Federación Galega de Municipios e Provincias, as asociacións de comunidades de
montes e forestais, os rematantes de madeira e as empresas forestais. Acepta a
nosa proposta de que a dinámica de traballo do grupo sexa a análise das causas
dos lumes e o estudio de solucións específicas para cada caso. Nas propostas
dalgunhas causas poden participar outros sectores relacionados co monte e co
diagnóstico realizado.
Aínda que a proposta da Dirección Xeral de Montes non é
exactamente a realizada pola ORGACCMM, optamos por aceptala polo noso desexo de
que boten a andar canto antes iniciativas serias que traballen na solución
desta catástrofe social, económica e ecolóxica.