Celebrada en Pontevedra a segunda edición de Forestalia
No pasado mes de outubro o Recinto Feiral de Pontevedra acolleu o II Salón
“Forestalia”, no que a Organización Galega de Comunidades de Montes estivo
presente cun pavillón e
participando nun foro de debate sobre o sector.
A presente edición tivo unha duración de catro días e contou cunha
notable asistencia de público. No pavillón da ORGACCMM repartiuse gran
cantidade de folletos informativos e exemplares do último número da revista ás
numerosas persoas que se achegaron para solicitar información sobre as
actividades das comunidades de montes e a actualidade das terras veciñais.
Ademais mantivéronse numerosos contactos, tanto con membros rectores das
comunidades de montes como con empresas do sector forestal e medio ambiente
natural. Salientou a xuntanza mantida cos representantes da Feira Forestal
Internacional de Tineo (Asturias), que convidaron á ORGACCMM á mesma e
ofreceron ampla información sobre os montes veciñais asturianos. Para a
defensa dos mesmos acaban de constituír a súa Federación de Montes Veciñais.
Por outra parte, no foro do sector celebrado no Pazo de Congresos, a Organización Galega estivo representada polo seu presidente Xosé A. Pereira. Cunha escasa asistencia de representantes das comunidades de montes, quizais debido a deficiencias na publicidade do acto, volveu salientar negativamente a intervención do representante da Consellería de Medio Ambiente, que esqueceu a función de moderador que tiña establecida para mudarse en defensor extemporáneo da Administración que lle paga.
Outra das cuestións debatidas nas conversas coas pequenas e medianas
empresas é a necesidade de unificar esforzos asociativos e fomentar un código
deontolóxico á hora de acometer os planos de traballo, tratando no posible de
contribuír á creación de emprego estable no medio rural.
No acto de clausura, a Cámara de Comercio de Pontevedra, organizadora
da Feira, anunciou que posiblemente Forestalia terá no futuro carácter
bianual, ritmo aconsellado pola aparición de novidades no sector e o seguimento
de investigacións e experimentos.