Avala a postura mantida pola ORGACCMM
Un estudio xurídico da Universidade de Vigo recomenda cambiar o réxime tributario das comunidades de montes
Un estudio realizado por Roberto I. Fernández López,
profesor titular de Dereito Financeiro e Tributario da Universidade de
Vigo (Campus de Ourense), critica fortemente a aplicación ás comunidades
de montes do Imposto sobre Sociedades e propón a elaboración dun réxime
fiscal específico para o monte veciñal.
O estudio xurídico, que leva o título de “Posibles
alternativas ó vixente réxime tributario das rendas xeradas polos montes
veciñais en man común”, foi elaborado por Roberto Fernández,
especialista que leva
realizado diversos traballos sobre o tema e ten estudiado con detalle a
imposición ós terreos comunais do modelo fiscal mercantil. Este informe
comeza cun capítulo onde se analiza desde a normativa legal a figura
singular dos montes veciñais, para pasar de seguido a estudiar as
consecuencias da aplicación do Imposto sobre Sociedades a estas
propiedades, especialmente no tocante ó absurdo de considerar ás
comunidades de montes como entidades mercantís. O último capítulo propón
outros modelos fiscais máis adaptados ós montes veciñais e de xestión
máis simplificada. O estudio detense especialmente a analizar as
consecuencias negativas da
aplicación
deste réxime fiscal nas zonas rurais do interior de Galicia, onde o
impacto é aínda máis gravoso ata constituír un verdadeiro atranco para
o desenvolvemento
rural. O informe cualifica como moi prexudicial a aplicación do Imposto
sobre Sociedades ó monte veciñal e considera que na lexislación fiscal
vixente hai figuras máis adecuadas que se poderían aplicar, como poden
ser a exención de rendas ou a atribución de renda directa, pola cal só
tributan no IRPF aqueles veciños comuneiros que acaden rendas cos
ingresos dos montes.
As conclusións do citado estudio xurídico coinciden coas posicións da
Organización Galega de Comunidades de Montes, que xa desde o primeiro
momento mantivo un aberto enfrontamento coa Administración por este tema
e que veu ratificada a súa postura no II Congreso Galego de Comunidades
de Montes celebrado en Pontevedra no pasado mes de xuño.
A organización dos comuneiros entregou copias do
devandito informe a todos os grupos políticos do Parlamento galego, á
Directora Xeral de Tributos da Consellería de Economía e Facenda da
Xunta de Galicia e ós deputados do Congreso, Guillerme Vázquez do BNG e
Ceferino Díaz do PSG/PSOE.
