Desde que perdeu a Xunta,
todo parece indicar que o PP se desfai e se desmoraliza | XOSÉ LUÍS
MÉNDEZ FERRÍN
Percibimos que a trama social que até agora
sostiña ao partido de Fraga Iribarne en infinidade de concellos está a
se esmallar desde o día no que perderon a maioranza absoluta. A
irrelevancia, e mesmo inexistencia, do PP nas zonas máis vivas do que,
no ronsel de Gramsci, todos din agora sociedade civil, viña contrastando
coa forza política coa que o PP, ao ter frente súa unha esquerda e unha
democracia non franquista electoralmente dividida, se instalaba nos
municipios e nas deputacións e acadaba maioría parlamentaria. No intre
presente, e desde que perdeu a Xunta, todo parece indicar que o PP se
desfai e se desmoraliza. Formados na escola do poder, non saben respirar
fóra del. A actual degradación interna do PP fíxose evidente na
filtración dos papeis que proban a súa implicación nos incendios que,
máis que nos decer nada novo, nos indica que no interior do partido de
Fraga Iribarne xa hai traidores, toupeiras, persoas dispostas e
preparadas para favorecer ao inimigo e seguramente non por diñeiro
inmediato. A figura dos leiróns abandonando as tillas dos barcos en
situación de perigo é tan obvia que me dá un certo noxo sacala agora
nesta columna. A imaxe de Núñez Feijóo é a dunha pálida pantasma, tanto
que na Arousa xa o coñecen coma "O Defuntiño", coma aqueles retratos dos
carteis electorais que o sol e a chuva, e sobre todo a derrota, fixeron
esvaecer despois de que os votantes os convertesen en inútiles.
Porque si, apareceron as probas da implicación do PP nos incendios. A
secretaria de organización da Coruña cursoulle instrucións e consignas
aos seus alcaldes, que se supón que foron as mesmas que as dirixidas ás
outras provincias: boicotear a formación das brigadas contra os
incendios para criar o caos. Son tan precisas as instrucións que non
requiren glosa ningunha. Naturalmente a folla de ruta para o verán non
ía acompañada de latas de gasolina nin de isqueiros nin de mechas.
Seguramente os alcaldes que obedeceron a consigna de boicot á
organización contra incendios da Xunta estaban tamén nesa manifestación
do PP que pretendeu emular, en clave de farsa, iso si, as de Nunca Máis
o pasado domingo. O escándalo está a ser tan estrepitoso coma o fracaso
da manifestación.
Fagamos memoria, pois é o ano dela, daquel Sancho Rof, ministro de UCD,
que lle quitaba ferro ao asunto dos aceites de colza dicindo que
contiñan un insignificante "bichito que se cayó de una mesa". Ou
lembren, a lor da catástrofe dos "Prestige", a Rajoy e os do PP a falar
duns tamén insignificantes "hilillos de aceite". Non máis onte, un
destacado xornalista da dereita eterna das Españas, Fernando Ónega, saíu
en auxilio do Defuntiño, esta vez máis pálido ca nunca, dicindo que o
xefe dos dereitistas de Galicia nada sabía das instrucións sobre
incendios e que o documento só era unha "chiquillada" insignificante.
Defuntiño non dixo "chiquillada"; limitouse a recoñecer que aquel
documento infame recollía algún que outro "párrafo infeliz" (e
seguramente tamén insignificante).
O esperpento continúa. |
|
