Onte venres 25 de abril
a Asociación de Amigos do Monte Veciñal celebrou unha Asemblea de Socios co
obxecto de abordar o borrador da lei de montes de Galicia.
No debate do contido da
lei considerouse un retroceso abordar os montes veciñais e a súa
regulamentación no marco dunha lei sectorial do aproveitamento forestal, na
consideración de que o monte veciñal transcende ao seu aproveitamento e debe
ser tratado de forma independente como un elemento singular da cultura galega e
do noso patrimonio material e inmaterial.
Por outra banda,
entrando no desenvolvemento da lei, esta introduce rebaixas na protección dos
montes veciñais fronte agresións externas de xeito que se antes tiñan o réxime
de protección dos montes públicos agora se lles pasa á consideración de montes
privados polo que a tutela administrativa sobre eles queda unicamente
regulamentada para o caso do abandono mais non para a defensa da integridade do
monte veciñal.
A regulamentación que
se fai agora do grave abandono, inda que máis detallada que na lei 13/89 de
montes veciñais en man común de Galicia, non acaba de estabelecer indicadores
precisos, sendo un acto potestativo da administración sen sequera establecer un
procedemento para escoitar á comunidade de montes. Deste xeito ábrese a porta a
un alleamento dos montes xa que poderán concederse para o seu aproveitamento
privado por un período de tempo tan longo coma a quenda de aproveitamento da
especia máis lonxeva, é dicir, podemos estar a falar de privar á comunidade
veciñal de recuperar o seu monte en períodos de 100 ou 200 anos.
A administración
forestal parece recoñecer con este borrador de lei a súa incapacidade de
xestión da protección dos montes veciñais e crea un instrumento para quitarse
de enriba este compromiso.
A Asociación de Amigos
do Monte Veciñal (AMIVE) constituíuse en Vigo no ano 2005 e ten por finalidade
a defensa e recoñecemento público da figura do Monte veciñal e das Comunidades
de Montes.