Obxecto e beneficiarios da Asociación de Amigos do Monte Veciñal en Man Común.<?xml:namespace prefix = o ns = "urn:schemas-microsoft-com:office:office" />

a).- A Asociación de Amigos do Monte Veciñal en Man Común ten por obxecto a promoción e o desenvolvemento de actividades relacionadas coa figura do Monte Veciñal en Man Común.

b).- Para o cumprimento do obxecto a Asociación de Amigos do Monte Veciñal en Man Común poderá promover ou realizar entre outras actividades:

1).- Foros de debate e opinión sobre aquelas medidas legais ou técnicas que poidan afectar ós montes veciñais en man común en tódala súa esfera de influencia e significado, elaborando propostas que contemplen e promovan a comunidade de monte veciñal en man común e os seus montes nos planos de desenvolvemento local e rural, e promocionando o fomento da Xestión Sostible dos recursos e aproveitamentos dos montes veciñais en man común.

2).- Apoio á formación consolidación, e bo funcionamento das comunidades de montes veciñais en man común, en tódolos seus ámbitos. En particular neste eido a Asociación promoverá o intercambio de coñecementos  e apoio dende as comunidades ou foros máis desenvolvidos a aquelas zonas de Galicia onde a figura da comunidade de montes teña un menor desenvolvemento. A Asociación tamén promoverá a relación da comunidade veciñal con outras figuras similares de natureza xermánica doutras comunidades autónomas ou países.

3).- Programas de estudio e investigación relacionados coa historia e o presente do significado social da figura e da realidade xeográfica e natural dos montes veciñais en man común, incluíndo a creación dunha base de documentación con fondos bibliográficos e audiovisuais, sobre o monte veciñal en man común. Como complemento a estes programas, procurarase a difusión mediante campañas de divulgación da figura da comunidade de monte veciñal en man común, tanto nos medios rurais, coma especialmente nos medios urbanos. O desenvolvemento de planos educativos dirixidos á poboación escolar sobre a realidade da comunidade e as comunidades de montes veciñais en man común.

4).- A creación dunha Fundación que ampare baixo o eido desta figura xurídica ós obxectos da Asociación e dea cabida á participación directa na mesma das Comunidades de Montes e Institucións.

5).- Calquera outro relacionado co punto a) do presente artigo que sexa acordado polos órganos de goberno da Asociación conforme á legalidade vixente e o definido polos presentes estatutos.

c).- A Asociación de Amigos do Monte Veciñal en Man Común poderá utilizar, promover ou desenvolver os seguintes medios:

1).- Seminarios, congresos, conferencias, foros, páxinas web, coloquios ou debates sobre o obxecto da Asociación; incluíndo convenios, contratos ou creación de centros destinados á realización de estudios e informes; así coma a realización, financiamento e difusión de edicións impresas, audiovisuais ou calesquera soporte das novas tecnoloxías; e a orientación e perfeccionamento ou desenvolvemento de tarefas de axuda e ensinanza no eido do obxecto da Asociación.

2).- Canalización ou creación de axudas, subvencións, becas e premios para a realización de estudios ou traballos en institucións docentes públicas ou privadas, propias ou alleas relacionadas cos fins fundacionais.

3).- Calquera outro relacionado co punto a) do presente artigo que sexa acordado polos órganos de goberno da Asociación conforme á legalidade vixente e o definido polos presentes estatutos.

E máis nada, ... somentes que unha causa do nacemento da Asociación é o descoñecemento da sociedade do que son e poden siñificar os Montes Veciñais no progreso de Galicia. Neste senso o contar dentro da Asociación con amigos xornalistas sería fundamental: os bos e xenerosos animádevos.